Finalistar i trekt rekkefølge: 

1. Emil Horstad
2. Vegard Hansen
3. Thomas Nilssen
4. Mads Erik Odde
5. Terje Rusten

Finalistar i trekt rekkefølge: 
1. Britt Elise Skram
2. Marius Westling
3. Ole Erik Feragen
4. Hans Sandum
5. Leif Inge Schjølberg
 

Finalistar i startrekkefølge: 

1. Rikke van Ommeren

2. Even Offerdal Bakken

3. Jørn Kjetil Solbakken

4. Silja Lid Strysse

5. Simen Fjeldberg Håland

Her kan du sjå resten av resultata

Velkomen til den andre dagen på Landsfestivalen! Torsdag 30. juli blir ein innhaldsrik festivaldag med solospel, pardans, tre finalar, aktivitetar for dei yngste, plateslepp og dans til langt på natt.

No er tevlingane verkeleg i gang!
Etter ein strålande opningsdag er vi klare for den fyrste heile festivaldagen i Vågå. Frå klokka 09.30 torsdag morgon og til den siste tonen kling ut om natta, blir det levande musikk, tevlingar og dans på fleire arenaer.

Onsdag vart jubileumsfestivalen offisielt opna i Vågåhallen. Dei fyrste deltakarane gjekk på scena i samspel senior og junior, før publikum fekk oppleve den varierte klassa solo andre instrument og vokal senior.

Ivar Schjølberg fekk Landsfestivalens heiderspris
Under opninga onsdag kveld vart Ivar Schjølberg frå Vågå tildelt den aller fyrste Landsfestivalens heiderspris. Styret i FolkOrg har oppretta den nye, årlege prisen i samband med 40-årsjubileet til Landsfestivalen. Prisen skal gå til ein person, ei gruppe eller eit lag som gjennom lang tid har gjort ein særleg viktig innsats for å fremje gammaldansmusikken og gammaldansen.

Ivar Schjølberg fekk prisen for det store og verdifulle arbeidet han har lagt ned som felespelar, dommar, tillitsvald, leiar og kulturberar. Han var ein av dei sentrale kreftene då Landsfestivalen vart etablert på midten av 1980-talet, og har gjennom mange tiår vore med på å byggje opp mykje av aktiviteten og miljøet som festivalen kviler på i dag. Prisen vart delt ut av styreleiar i FolkOrg, Kristian Ihle Hanto.
Her kan du lese meir om prisutdelinga onsdag

Det var finalespel i samspel senior onsdag
Etter jubileumsopninga onsdag kveld var det klart for festivalens fyrste finale. Desse gruppene kvalifiserte seg til finalen i samspel senior:

1. Simen og Silja
2. Nilssen/Westling
3. Ingrid and the Vegar(d)s
4. Særsvip
5. Dag Gården og Leif Inge Schjølberg

Finalistane fekk spele for eit fullt dansegolv og eit lyttande publikum i Vågåhallen onsdag kveld. Kven som endar på dei tre øvste plassane i klassa, får vi ikkje vete før på Meisterkonserten sundag. 

I klassane som ikkje har finale, blir resultata haldne hemmelege fram til premieutdelinga laurdag kveld. Det betyr at vi laurdag kveld mellom anna får vite kven som går til topps i samspel junior og solo andre instrument og vokal senior.

Tevlingane torsdag startar klokka 09.30
Torsdag er den fyrste heile tevlingsdagen på Landsfestivalen, og alt klokka 09.30 er dei fyrste deltakarane klare på scena i Vågåhallen.

Dagen startar med solo durspel senior. Heile 28 deltakarar skal vise kva dei kan på durspel. Her får publikum høyre eit stort spenn av slåttar, uttrykk og lokale speletradisjonar frå ulike delar av landet.

Som elles under Landsfestivalen er publikum velkomne ut på dansegolvet. Tevlinga er ikkje berre noko ein skal sitje og lytte til, musikken skal òg brukast til dans!

Klokka 13.30 held tevlingsprogrammet fram med solo fele og hardingfele senior. 24 utøvarar er påmelde i klassa, desse deltakarane representerer lag og miljø frå store delar av landet. Også her er dansegolvet ope, så det er berre å finne fram danseskoa!

Klokka 17.00 står trekkspel senior for tur i Vågåhallen og 21 trekkspelarar skal tevle om plass i kveldens finale i solo trekkspel senior. 

Pardans i kulturhuset
Klokka 18.00 startar tevlinga i pardans senior i Vågå kulturhus. 41 par er påmelde, fordelte på åtte heat. Her får publikum oppleve ulike variantar av reinlender, vals, polka, masurka og pols frå ulike tradisjonsmiljø rundt om i landet.

I danseklassane er det naturleg nok deltakarane som har dansegolvet for seg sjølve. Kulturhuset har amfi, slik at publikum får godt utsyn og kan følgje dansen tett.

Finalen i pardans senior vert fredag kveld, og kven som kjem til finala vert ikkje offentleg før meisterkonserten som er fredag kl 12.00. 

Tre finalar torsdag kveld
Klokka 20.30 er det klart for finalespel i Vågåhallen.

Denne kvelden skal det vere finalar i soloklassane durspel senior, fele og hardingfele senior og trekkspel senior. Kven som får finaleplassane, blir avgjort gjennom dei innleiande tevlingane tidlegare på dagen. I finalane får dei kvalifiserte deltakarane ei ny moglegheit til å vise seg fram for dommarane, publikum og dansarane på golvet.

Sjølv om finalespelet blir gjennomført torsdag kveld, blir ikkje vinnarane avslørte med ein gong. Kven som tek dei tre øvste plassane i klassane, får vi vite under meisterkonserten sundag.

Songleik og dans for dei yngste
Torsdag byr òg på fleire eigne aktivitetar for borna på Landsfestivalen.

Klokka 12.00 inviterer Lina Brenden og Iselin Aukrust til songleik og dans i idylliske Ullinsvin prestegard. Tilbodet passar for born frå barnehagealder og opp til 4. klasse. Her får ungane lære lokale songstubbar, gammaldans og songleikar som er tilrettelagde for born. Målet er å skape ein sosial møteplass der dei yngste kan oppleve fellesskap, rørsle og musikkglede saman med andre born på festivalen.

Det er gratis å delta, og det er inga påmelding. Her er det berre å møte opp!

Gratis dansekurs i matteltet
Klokka 16.00 blir det gratis dansekurs i matteltet. Kurset har ekstra fokus på born og unge, men alle som har lyst til å prøve seg på dansegolvet, er velkomne. Det krevst ingen forkunnskapar, og ein treng heller ikkje å ha med seg ein dansepartnar.

På Landsfestivalen skal terskelen vere låg for å delta. Kanskje blir dette fyrste gongen du prøver gammaldans, eller kanskje du berre vil lære nokre nye steg før kveldens dansespel? Det er gratis å vere med, og det er inga påmelding.

Landsfestivalen juniorspelemannslag
Det er endeleg klart for første øving med Landsfestivalen juniorspelemannslag. Alle som vil vere med møter opp ved ungdomsteltet kl 14.00. Det er Øyvind Sandum som har ansvaret for øvingane. Her kan du lese meir om kva Landsfestivalen juniorspelemannslag er

Plateslepp på Sve gard
Klokka 18.30 inviterer Leif Inge Schjølberg og Dag Gården til plateslepp i Brenneriet på Sve gard.

Dei to musikarane er godt forankra i folkemusikktradisjonen i Ottadalen og har begge om lag 50 års erfaring som spelemenn. På den nye plata «Ettsleppen» spelar Schjølberg fele og Gården trekkspel.

Plata inneheld slåttar etter sentrale tradisjonsberarar frå Ottadalen. I tillegg framfører duoen eigenkomponert materiale i tradisjonell stil, og som ikkje dette er nok får du vete litt meir om ulike produksjonar på Sve Gard. 

Dansespelet startar klokka 15.30
Det blir ikkje berre dans til tevlingar torsdag. I matteltet startar dansespelet alt klokka 15.30, når Osterøybelgen går på scena. Deretter blir det musikk frå ei lang rekkje lag og grupper gjennom ettermiddagen, kvelden og natta.

Det er gratis inngang på arenaen til kl 19.00 kvar dag slik at alle som vil kan stikke innom og høyre på musikk, danse og kjøpe seg god mat og drikke til. Du treng kun billett dersom du vil inn på tevlingar. Her kan du lese om servering og opningstider i matteltet

I Vågåhallen kan publikum danse til finalespelet frå klokka 20.30. Når klokka passerer midnatt, blir det òg dansespel i kulturhuset. Mange moglegheiter for å få brukt danseskoa!

Dette skjer torsdag
Kl. 09.30: Solo durspel senior - Vågåhallen
Kl. 12.00: Songleik og dans med Lina og Iselin - Ullinsvin prestegard
Kl. 13.30: Solo fele og hardingfele senior - Vågåhallen
Kl. 14.00: Øving med Landfestivalen juniorspelemannslag - Ungdomsteltet
Kl. 15.30: Dansespel - matteltet
Kl. 16.00: Gratis dansekurs med ekstra fokus på born og unge - matteltet
Kl. 17.00: Solo trekkspel senior - Vågåhallen
Kl. 18.00: Pardans senior - kulturhuset
Kl. 18.30: Plateslepp med Leif Inge Schjølberg og Dag Gården - Sve gard
Kl. 20.30: Finalar i durspel senior, fele og hardingfele senior og trekkspel senior - Vågåhallen
Kl. 00.00: Dansespel startar - kulturhuset

Torsdag blir med andre ord ein dag fylt med solospel, dans, aktivitetar for dei yngste, plateslepp og tre spennande finalar.

Velkomen til ein ny innhaldsrik festivaldag i Vågå!

RESULTAT
Her kan du sjå alle resultat etter hand som dei vert offentlege

Prisvinnar 2026: Ivar Schjølberg

Under opninga av Landsfestivalen i Vågå vart det altså Ivar Schjølberg som fekk utdelt prisen. Her er grunngjevinga frå styret:

Ivar Schjølberg har gjennom eit langt liv lagt ned eit stort og verdifullt arbeid for norsk folkemusikk og gammaldans, både som utøvar, tillitsvald, organisasjonsmenneske og kulturberar.

For Landsfestivalen i gammaldansmusikk har Ivar Schjølberg hatt ei særleg viktig rolle. Gjennom sitt arbeid i Landslaget for Spelemenn var han ein av dei sentrale kreftene i arbeidet med å etablere Landsfestivalen på midten av 1980-talet. Han var med på å forme ein ny nasjonal møteplass for gammaldansmusikken – ein arena som gjennom snart fire tiår har samla utøvarar, dansarar og publikum frå heile landet.

Landsfestivalen har vore avgjerande for å styrkje statusen til gammaldansmusikken og gammaldansen, og gjere dette til noko felleseige for laga og miljøet. Den betydninga festivalen har i dag, kviler på innsatsen til dei som såg behovet for ein slik arena og arbeidde for å få han etablert. Ivar Schjølberg var av dei mest sentrale av desse.

Ivar Schjølberg gjennom mange tiår gjort ein stor innsats som felespelar, dommar, tillitsvald og leiar. Han sat ni år i styret i Landslaget for Spelemenn, mellom anna som nestleiar og leiar. Dette arbeidet vart han utnemnd til heidersmedlem i LfS for.

Landsfestivalens heiderspris er han særskilt verdig til på grunna av hans rolle i etableringa av Landsfestivalen i gammaldans for 40 år sidan. Han var leiar i LfS da det kokte som mest kring saka om gammaldansen og opprettinga av Landsfestivalen.

Gjennom sitt mangeårige arbeid har Ivar Schjølberg vore med og leggje grunnlaget for mykje av den aktiviteten og det miljøet som Landsfestivalen i gammaldansmusikk byggjer på i dag.

På dette grunnlaget er Ivar Schjølberg ein sterk kandidat til Landsfestivalens heiderspris i Landsfestivalens 40-årsjubileumsår.

Det var styreleiar Kristian Hanto som delte ut prisen til vinnaren.

Foto: Thor Hauknes

Tysdag

18.00: Gammaldanspub på Søre Bu

Onsdag

15.00: Samspel senior og junior - Hallen

18.30: Andre instrument og vokal senior - Hallen

20.00: Opning av Landsfestivalen 2026 – 40 år! - Hallen

21.00: Finale - Hallen

21.30: Dansespel - Matteltet

22.30: Dansespel - Kulturhuset

Torsdag

09.30: Durspel senior - Hallen

12.00: Songleik for dei yngste - Ullinsvin

13.30: Fele/hardingfele senior - Hallen

14.00: Landfestivalen juniorspelemannslag, øving - Ungdomsteltet

15.30: Dansespel - Matteltet

16.00: Dansekurs for born og unge - Matteltet

17.00: Trekkspel senior - Hallen

18.00: Pardans senior - Kulturhuset

18.30: Plateslepp med Leif Inge Schjølberg og Dag Gården - Sve Gard

20.30: Finalar - Hallen

00.00: Dansespel - Kulturhuset

Fredag

09.30: Lagspel fele/hardingfele - Hallen

12.00: Songleik for dei yngste - Ullinsvin

14.00: Landfestivalen juniorspelemannslag, øving - Ungdomsteltet

14.30: Lagspel durspel/trekkspel - Hallen

15.30: Dansespel - Matteltet

16.00: Dansekurs for born og unge - Matteltet

16:40: Landfestivalen juniorspelemannslag, dansespel - Matteltet

18.00: Plateslepp med Skultbakkalaget - Matteltet

19.00: Konsert: «Heilt øre – ein gammaldansfantasi» - Hallen

19.00: Dansespel - Kulturhuset

20.30: Finalar - Hallen

01.00: Dansespel - Hallen

Laurdag

09.30: Gruppespel, del 1 - Hallen

12.00: Superfestival - Scena ved kommunehuset

13.00: Super Junior, alle soloklassane i junior - Hallen

16.00: Gruppespel, del 2 - Hallen

16.00: Dansespel - Matteltet

17.30: Lagdans junior og senior - Kulturhuset

19.00: Plateslepp med Naustedalen spelemannslag og Håvard Svensrud - Matteltet

20.30: Finalar - Hallen

20.30: Dansespel - Kulturhuset

Sundag

12.00: Meisterkonsert - Hallen

PROGRAMSIDE
Her ser du alle programpostane og kan sortere mellom kultur, tevling og dans: 
Klikk her for å komme til programsida

STARTLISTER
Sjå alle startlister her

DANSESPEL
Sjå oversikt over dansespel her

BORNAS LANDSFESTIVAL
Sjå oversikt over bornas landsfestival her

1. Simen og Silja
2. Nilssen/Westling
3. Ingrid and the Vegar(d)s
4. Særsvip
5. Dag Gården og Leif Inge Schjølberg

Resten av resultatlista finn de her

Laurdag vert det premieutdeling for alle klassar det ikkje er finale i.

Plan for Landsfestivalen juniorspelemannslag

Torsdag kl. 14.00
Fellesøving til Landsfestivalen juniorspelemannslag
Oppmøte: Ungdomsteltet (ved matteltet)

Fredag kl. 14.00
Fellesøving for Landsfestivalen juniorspelemannslag
Oppmøte: Ungdomsteltet (ved matteltet)

Fredag kl. 16.40
Dansespel i matteltet for Landsfestivalen juniorspelemannslag
Oppmøte: Matteltet 

Kontaktperson: 
Gro Visdal
Kultur og dansespel
E-post: gro@landsfestivalen.no
Tlf: +47 482 59 111

Les meir om Landsfestivalen juniorspelemannslag her

Parkering for festivalgjestar
Alle som vil på dagsbesøk til Landsfestivalen kan parkere ved hallen på eigen stor parkeringsplass. 
Det er stengt i vegen gjennom sentrum for å sikre trygg festival-arena for store og små. Det er overgang for deltakrarar og gjestar over vegen mellom skulen og hallen så det er trygt for alle at vegen er stengt. 

Kjem du frå Otta-kanten?
Kjør inn første rundkjøringa mot Vågå sentrum (mot Villa Vågå hotell). 
Kjør over brua og gjennom sentrum til du kjem til parkeringsvakter i gata - dei viser folk til parkeringsplassar. 

Kjem du frå Loms-kanten? 
Kjør rett fram i første rundkjøringa - altså ikkje inn ved YX, men vidare til neste rundkjøyring. 
Kjør over brua og gjennom sentrum til du kjem til parkeringsvakter i gata - dei viser folk til parkeringsplassar. 

Besøk gjerne Vågå sentrum! 
I festivalveka er det pynta til festival i heile sentrum! Ta gjerne turen innom dei koslege kafeane og butikkane i sentrum. Plutseleg dukkar det opp musikantar her og der i sentrum og! 
Laurdag er det SUPERFESTIVAL utanfor kommunehuset! 

Onsdag på Landsfestivalen – no startar jubileumsfesten!
Onsdag 29. juli opnar Landsfestivalen i gammaldansmusikk dørene til fem dagar med levande musikk, dans, tevlingar og folkeliv i Vågå. Årets festival markerer at det er 40 år sidan den fyrste Landsfestivalen vart arrangert i Førde i 1986, og jubileet blir feira med rekordstor deltaking!

Heile 1 015 deltakarar, fordelte på 302 startnummer i 16 ulike klassar, er klare for festivalen. I tillegg skal meir enn 90 grupper og lag fylle dansegolva, gatene og møteplassane i Vågå med musikk gjennom festivalveka. Saman med rundt 450 frivillige er Vågå Trekkspelklubb klar til å ønskje gammaldans-Noreg velkomen til ei heilt spesiell jubileumsfeiring.

Tevlingane startar klokka 15.00
Klokka 15.00 går dei fyrste deltakarane i årets festival på scena i Vågåhallen. Festivalen startar med samspelklassane for både senior og junior. Samspel er klassa for grupper med to eller tre personar, og deltakarane kan stille med ulike instrument.

På Landsfestivalen er ikkje tevlingane berre noko ein sit stille og ser på. Publikum kan danse til nesten alle speltevlingane, og det er difor mogleg å danse i Vågåhallen allereie frå fyrste deltakar. På denne måten kan du oppleve gammaldansmusikken slik han er meint å opplevast: levande, tett på og med dansarar på golvet.

Klokka 18.30 held tevlingsprogrammet fram med klassa solo andre instrument og vokal senior. Denne klassa viser noko av den store breidda i gammaldansmiljøet og gjev plass til både songarar og instrument som ikkje er med i dei andre soloklassane. I år får vi oppleve vokal, munnspel og mandolin!

Heile Vågå blir ei festivalbygd
Under Landsfestivalen blir Vågå sentrum forvandla til ein levande festivalarena. Det er kort veg mellom Vågåhallen, kulturhuset, matteltet og dei andre møteplassane i sentrum.

Gjennom festivalveka vil spel og musikk møte deg både inne på tevlingane og ute i gatene. Her kan du høyre eit spelemannslag spele i sentrum, møte gamle og nye kjende over ein kaffikopp i matteltet eller la deg lokke ut på dansegolvet av musikk frå nokre av dei beste gammaldansutøvarane i landet.

Landsfestivalen er ein møteplass for alle som har eit hjarte for gammaldansmusikken, anten du kjem for å tevle, spele, danse, høyre på musikken eller berre oppleve den heilt spesielle festivalstemninga.

Jubileumsopning klokka 20.00
Klokka 20.00 blir Landsfestivalen 2026 offisielt opna i Vågåhallen.

I år er det 40 år sidan den fyrste Landsfestivalen vart arrangert, og jubileumsopninga blir starten på ei festivalveke der både historia og framtida til gammaldansmusikken skal feirast.

Vågå har gjennom fleire tiår vore vertskap for store folkemusikkarrangement, og bygda er igjen klar til å ta imot deltakarar og publikum frå heile landet. Arrangørlaget Vågå Trekkspelklubb har dessutan sitt eige jubileum i 2026 og feirar 50 år. Alt dette skal sjølvsagt feirast!

Ta gjerne turen til festivalområdet for å vere med når vi klokka 20.00 offisielt opnar den største nasjonale møteplassen for alle som er glade i gammaldansmusikk!

Fyrste finale allereie onsdag
Etter jubileumsopninga er vi klare for den fyrste finalen på festivalen. Klokka 21.00 er det klart for finale i samspel senior, og vi får møte dei beste gruppene frå kvalifiseringa på nytt.

Sjølvsagt kan du danse til finalespelet, men du kan òg berre sitje og lytte til den gode musikken.

Dans på fleire golv
Når finalen er over, held musikken og dansen sjølvsagt fram utover kvelden på fleire golv.

Klokka 21.30 startar dansespelet i matteltet, og frå klokka 22.30 blir det òg dansespel i kulturhuset. Dermed kan du vandre mellom fleire arenaer, høyre ulike lag og grupper og danse så lenge føtene held!

Billettar
Du kan kjøpe ein dagsbillett som gjeld for heile programmet denne dagen: tevlingar, jubileumsopning, finale og dansespel.

Du kan òg kjøpe ein gjennomgangsbillett som gjeld for heile festivalen, med unntak av konserten «Heilt øre» fredag kveld.

Dette skjer onsdag
Kl. 15.00: Samspel senior og junior – Vågåhallen
Kl. 18.30: Solo andre instrument og vokal senior – Vågåhallen
Kl. 20.00: Opning av Landsfestivalen 2026 – 40 år! – Vågåhallen
Kl. 21.00: Finale i samspel senior – Vågåhallen
Kl. 21.30: Dansespel – matteltet
Kl. 22.30: Dansespel – kulturhuset

Og tenk: Onsdag er berre byrjinga på fem dagar fylte med gode musikalske opplevingar, danseglede, inspirerande møte og minne som varer lenge etter at den siste tonen har stilna.

Med andre ord: Velkomen til jubileumsfestival og folkefest i Vågå!